أية نعم يمكن ملابسك بس للكشخة ويمكن عشان…
لحظة ما راح احرق عليك الموضوع تعال كمل اقرأ وراح تفهم المقصد…!
المقدمة:
كلمة “كشخة” تستخدم للدلالة على الأناقة والتميز في المظهر الشخصي. يمكن للأفراد استخدامها للتعبير عن ارتدائهم للملابس بطريقة أنيقة ومتميزة.
كثير من الناس اللي تحب تكشخ عشان تبرز جمالها، وكمان في نوع من الناس اللي بتكشخ عشان تحس بالراحة في طلعاتها وفي ناس بتلبس “كشخة مريحة” عشان ترتاح في جلستها في البيت مثل -البجامة المفضلة في دولابك- اللي تلبسها بعد يوم طويل أو لبسك الفنان في العيد، يعني الكشخة شيء أساسي رغم اختلاف أهدافه اليومية لكل فرد. بس ودي أقولكم إن الملابس مش بس للكشخة، الملابس لها دور كبير في البيئة
تصدق عاد؟
أعطيني دقائق من وقتك وراح أفجر القنبلة الصادمة اللي عرفتها من فترة عن الكشخة…
هل الكشخة عدوتك؟
عمومًا، كلنا عارفين إن الناس بتشتري ملابس جديدة من غير ما تحتاجها أحياناً. ولكن هل هذي الملابس بتأثر بشكل مباشر على البيئة؟
نعم للأسف لأن فكرة استهلاك كميات كبيرة من الموارد الطبيعية وإنتاج الملابس بتسبب تلوث كبير للبيئة، فمثلاً: انتاج الألياف المصنعة يشمل استخدام مواد كيميائية ضارة واستهلاك طاقة كبيرة غير التأثير على الانسان عند ارتداء بعض الملابس التي قد تكون متشبعة بهذه المواد السامة” يعني رحنا فيها”.
كيف تخلي كشختك مستدامة؟
المشكلة مو في إنك تشتري ملابس جديدة، المشكلة في الكمية اللي بتشتريها ومدى التأثير البيئي اللي بتسببه بدون قصد منك. أفضل حل هو تقليل الاستهلاك والتفكير المستدام في الملابس. يعني ممكن تشتري ملابس مستعملة، وممكن تعمل إعادة تدوير للملابس القديمة بدل ما ترميها. وأهم نقطة لازم تفكر فيها قبل تضغط على زر الشراء أو تفكر ترمي أي لبس عن الضرر والتلوث اللي ممكن يسببه للعالم
لازم تتخلص من كشختك؟
المشكلة الثانية في الملابس هي التخلص منها. أكيد كلنا شفنا زي ذي الصورة اللي فيها كمية من الملابس اللي تنرمى سنويًا في مكبات النفايات. فأفضل حل هو إعادة التدوير اواعادة الاستخدام. وممكن تتبرع بالملابس اللي ما تحتاجها للمؤسسات الخيرية أو تساهم فيها لإعادة تدويرها في فاشن لووب. بس لا تنسى تتأكد إن الملابس اللي بتساهم فيها ما تكون ذات جودة سيئة عشان غيرك يستفيد منها ويفرح فيها.
وأخيرًا
راح أعطيك زبدة الموضوع، الملابس مو بس للزينة و الكشخة، الملابس لها دور كبير في حياتنا وفي البيئة. عشان كذا فكر كثييير قبل ما تشتري او تتخلص من الملابس. و اهتم بالاستدامة وتبني التفكير المستدام، عشان نعيش في عالم أفضل لنا وللأجيال القادمة.
ولا تنسى، تقدر تكون أنيق و كشخة بدون ما تأثر على البيئة.
